បន្ទាយមានជ័យ៖ លោកឧត្តមសេនីយ៍ត្រី សឿម សារិទ្ធ ស្នងការនគរបាលខេត្តបន្ទាយមានជ័យ នៅថ្ងៃទី១១ ខែកញ្ញា ឆ្នាំ២០២៦ បានដឹកនាំកិច្ចប្រជុំបន្ទាន់មួយ ដើម្បីពង្រឹងការងារដឹកនាំ បែងចែកភារកិច្ច និងដាក់ចេញផែនការការពារសន្តិសុខ សុវត្ថិភាពជូនថ្នាក់ដឹកនាំដែលចុះបំពេញបេសកកម្មក្នុងខេត្ត។
កិច្ចប្រជុំនេះបានផ្តោតលើរបៀបវារៈសំខាន់ៗពីរ រួមមាន ១–ការប្រកាសទទួលស្គាល់សមាសភាពស្នងការរង និងការផ្លាស់ប្តូរផែនការងារថ្មី និង២–ការផ្សព្វផ្សាយផែនការការពារសុវត្ថិភាពជូនថ្នាក់ដឹកនាំ។
ថ្លែងក្នុងអង្គប្រជុំ លោកស្នងការបានជំរុញឱ្យកងកម្លាំងទាំងអស់បង្កើនប្រសិទ្ធភាពការងារ ពង្រឹងការប្រចាំបញ្ជា២៤ម៉ោងលើ២៤ម៉ោង ដើម្បីផ្តល់សេវាសាធារណៈ និងធានាសន្តិសុខជូនប្រជាពលរដ្ឋឱ្យបានទាន់ពេលវេលា។
ទន្ទឹមនឹងនេះ លោកបានដាក់បទបញ្ជាយ៉ាងម៉ឺងម៉ាត់ដល់អធិការនគរបាលក្រុង–ស្រុក និងប៉ុស្តិ៍រដ្ឋបាលទាំងអស់ ឱ្យពង្រឹងការយាមល្បាត ត្រួតពិនិត្យរដ្ឋបាល និងទប់ស្កាត់បង្ក្រាបបទល្មើសគ្រប់ប្រភេទ ដូចជាបទល្មើសព្រហ្មទណ្ឌ គ្រឿងញៀន ក្មេងទំនើង បទល្មើសឆ្លងដែន និងបទល្មើសបច្ចេកវិទ្យា ដើម្បីធានាបាននូវភូមិ ឃុំ–សង្កាត់ មានសុវត្ថិភាពពិតប្រាកដ៕
