ភ្នំពេញ៖ លោកជំទាវវេជ្ជបណ្ឌិត ប្រាក់ សោភ័ណនារី រដ្ឋលេខាធិការក្រសួងសុខាភិបាល នាព្រឹកថ្ងៃទី២៧ ខែវិច្ឆិកា ឆ្នាំ២០២៥ បានអញ្ជើញជាអធិបតីក្នុងពិធីបើកសិក្ខាសាលាផ្សព្វផ្សាយរបាយការណ៍ ស្តីពីការវិភាគខ្សែសង្វាក់ផ្គត់ផ្គង់អាហារូបត្ថម្ភ នៅសណ្ឋាគារសាន់វេ រាជធានីភ្នំពេញ។
សិក្ខាសាលាផ្សព្វផ្សាយមានគោលបំណង៖
– ចែករំលែករបកគំហើញ និងអនុសាសន៍ ដើម្បីពង្រឹង និងគូសផែនទីខ្សែសង្វាក់ផ្គត់ផ្គង់អាហារូបត្ថម្ភ។
– កំណត់ភាពខ្លាំង និងកត្តារាំងស្ទះនៅក្នុងខ្សែសង្វាក់ផ្គត់ផ្គង់អាហារូបត្ថម្ភ។
– លើកសកម្មភាព ដើម្បីកែលម្អលទ្ធភាពទទួលបានផលិតផលអាហារូបត្ថម្ភនៅកម្ពុជា។
នាឱកាសនោះលោកជំទាវរដ្ឋលេខាធិការ បានលើកឡើងថា ការពង្រឹងខ្សែសង្វាក់ផ្គត់ផ្គង់អាហារូបត្ថម្ភ បានរួមចំណែកដោយផ្ទាល់ដល់ចក្ខុវិស័យទូលំទូលាយសម្រាប់ប្រព័ន្ធសុខាភិបាលមួយដ៏រឹងមាំ និងមានប្រសិទ្ធភាពជាងមុន។ តាមរយះរបកគំហើញនេះបានបង្ហាញឲ្យយើងឃើញពីលំហូរផលិតផលអាហារូបត្ថម្ភ កំណត់បាននូវភាពខ្លាំង និងកត្តារាំងស្ទះមួយចំនួនក្នុងខ្សែសង្វាក់ផ្គត់ផ្គង់អាហារូបត្ថម្ភ ដើម្បីធ្វើការកែលម្អឲ្យបានកាន់តែប្រសើរឡើង។ ដូចនេះការធ្វើសមាហរណកម្មជាមួយកម្មវិធីពាក់ព័ន្ធផ្សេងៗទៀត អាចកាត់បន្ថយបាននូវសកម្មភាពដែលត្រួតស៊ីគ្នា ហើយធ្វើឲ្យការប្រើប្រាស់ធនធានកាន់តែប្រសើរឡើង ដែលនេះគឺជាគន្លឹះសម្រាប់កសាងប្រព័ន្ធមួយដែលរឹងមាំ មានការសម្របសម្រួលល្អ និងមាននិរន្តរភាព។
ក្នុងនោះលោកជំទាវ រដ្ឋលេខាធិការ ក៏បានសំណូមពរដល់គ្រប់មូលដ្ឋានសុខាភិបាលទាំងអស់ ស្ថាប័នពាក់ព័ន្ធទាំងថ្នាក់ជាតិ និងថ្នាក់ក្រោមជាតិ ភាគីពាក់ព័ន្ធ សូមចូលរួមយ៉ាងសកម្ម និងរួមចំណែកក្នុងការបង្កើតផែនការដែលមានប្រសិទ្ធិភាព។
«ចូរយើងរួមគ្នាពង្រឹងខ្សែសង្វាក់ផ្គត់ផ្គង់ដើម្បីឱ្យកុមារ មាតា និងសហគមន៍ទាំងអស់ទទួលបាននូវផលិតផលអាហារូបត្ថម្ភដែលពួកគេត្រូវការ»៕
