(បន្ទាយមានជ័យ) វិទ្យាស្ថានពហុបច្ចេកទេសខេត្តបន្ទាយមានជ័យ បានរៀបចំបើកកិច្ចប្រជុំបូកសរុបលទ្ធផលការងារប្រចាំត្រីមាសទី២ និងរៀបចំទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈលើកទី៩ ឆ្នាំ២០២៦ (TEVT DAY) ក្រោមប្រធានបទ“TVET ផ្ដល់ជំនាញ ការងារ និងប្រាក់ចំណូល” ក្រោមអធិបតីភាពលោក យឹម សំណាង អភិបាលរង ខេត្ត និងជាអនុប្រធានគណៈកម្មាធិការបណ្ដុះបណ្ដាលខេត្ត តំណាងឯកឧត្តម អ៊ុំ រាត្រី អភិបាលខេត្តបន្ទាយមានជ័យ ជាប្រធានគណៈកម្មាធិការបណ្ដុះបណ្ដាលខេត្ត។ កិច្ចប្រជុំនេះធ្វើឡើងនៅសាលប្រជុំវិទ្យាស្ថានពហុបច្ចេកទេសខេត្តបន្ទាយមានជ័យ នាថ្ងៃទី១២ ខែមិថុនា ឆ្នាំ២០២៦ ដោយមានការចូលរួមពី លោកស្រី សំរិទ្ធ សូរ្យជាតិ នាយិកាវិទ្យាស្ថាន និងប្រធានលេខាធិការដ្ឋានគណៈកម្មាធិការបណ្ដុះបណ្ដាលខេត្ត លោក លោកស្រី តំណាងមន្ទីរអង្គភាពពាក់ព័ន្ធ តំណាងអង្គការ និងមេភូមិ ចៅសង្កាត់ទាំង៧ ក្នុងសិរីសោភ័ណ ផងដែរ។
លោកស្រី សំរិទ្ធ សូរ្យជាតិ ប្រធានលេខាធិការដ្ឋានគណៈកម្មាធិការបណ្ដុះបណ្ដាលខេត្ត បានរាយការណ៍អំពីវឌ្ឍនភាពការងាររបស់វិទ្យាស្ថាននិងលើកទិសដៅបន្តសម្រាប់ការបណ្ដុះបណ្ដាលកម្មវិធី១.៥លាននាក់ ក្នុងនោះដែរលោកស្រីក៏បានលើកពីបញ្ហាប្រឈម និងសំណូមពរទៅដល់លោក លោកស្រី មន្ទីរអង្គភាពពាក់ព័ន្ធ តំណាងអង្គការ និងមេភូមិ ចៅសង្កាត់ទាំង៧ ក្នុងសិរីសោភ័ណ ដើម្បីពិភាក្សា និងស្វែងរកយន្តការក្នុងការជ្រើសរើសសិស្ស និងធ្វើឲ្យសិស្ស ឬសិក្ខាកាមមានចំណាប់អារម្មណ៍ចង់សិក្សាលើជំនាញបច្ចេកទេស និងវិជ្ជាជីវៈឲ្យបានកាន់តែច្រើនជាងមុន និងរៀបចំកម្មវិធីសិក្សាឲ្យស្របទៅនឹងតម្រូវការរបស់ក្រុមហ៊ុនសហគ្រាស ដែលពួកគាត់ចង់បាន។
ថ្លែងនៅក្នុងឱកាសនោះដែរលោក យឹម សំណាង អភិបាលរង ខេត្ត និងជាអនុប្រធានគណៈកម្មាធិការបណ្ដុះបណ្ដាលខេត្ត បានមានប្រសាសន៍លើកឡើងថា៖ គោលបំណងចម្បងនៃការពិគ្រោះយោបល់នាថ្ងៃនេះគឺដើម្បី៖
១,កំណត់អត្តសញ្ញាណជ្រើសរើសសិស្សក្នុទាំងក្នុងគោលដៅនិងក្រៅប្រព័ន្ធ។
២,ពិភាក្សាបង្កើតអោយមានជនបង្គាលនៅតាមឃុំ/សង្កាត់ក្នុងកម្មវិធី១.៥លាននាក់(1.5M)។
៣,ការចូលរួមផ្សព្វផ្សាយកម្មវិធីទិវាជាតិអប់រំបណ្តុះបណ្តាលបច្ចេកទេសនិងវិជ្ជាជីវៈ លើកទី៩ ឆ្នាំ២០២៦ ក្រោមប្រធានបទ “TVET ផ្ដល់ជំនាញ ការងារ និងប្រាក់ចំណូល“។
លោក អភិបាលរង ខេត្តបានធ្វើការថ្លែងអំណរគុណ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំ មន្ត្រីរាជការ និងលោកគ្រូ–អ្នកគ្រូ នៃវិទ្យាស្ថានពហុបច្ចេកទេសខេត្ត ដែលបានសម្រេចលទ្ធផលការងារយ៉ាងល្អប្រសើរក្នុងត្រីមាសទី២ កន្លងមកនេះ។ ជាពិសេសថ្លែងអំណរអរគុណដ៏ខ្ពង់ខ្ពស់ចំពោះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលបានប្រកាសដាក់ឱ្យអនុវត្តជាផ្លូវការនូវកម្មវិធីបណ្តុះ បណ្តាលជំនាញវិជ្ជាជីវៈ និងបច្ចេកទេស ដល់យុវជនមកពីគ្រួសារក្រីក្រ និង គ្រួសារងាយរងហានិភ័យ កាលពីថ្ងៃទី១៤ ខែវិច្ឆិកា ឆ្នាំ២០២៣កន្លងទៅនេះ។
សម្រាប់វិទ្យាស្ថានពហុបច្ចេកទេសខេត្តបន្ទាយមានជ័យកម្មវិធីបណ្តុះបណ្តាលនេះមាន ចំនួន២៥ជំនាញ ក្នុងវិស័យអាទិភាពទាំង៦រួមមាន៖ ១. បរិក្ខាត្រជាក់ និងកំដៅ ២, ធុរកិច្ច និងព័ត៌មានវិទ្យា ៣,កម្មន្តសាល ៤,មេកានិករថយន្ត ៥,កសិកម្ម និងកសិឧស្សាហកម្ម ៦. អគ្គីសនី និងថាមពល ។
ជាពិសេសគឺដើម្បីធានាឲ្យបាននូវប្រសិទ្ធភាព ប្រសិទ្ធផល និងនិរន្តរភាពនៃការបណ្តុះបណ្តាល ស្របតាមប្រសាសន៍ សម្តេចបវរធិបតីនាយករដ្ឋមន្រ្តី គឺ រៀន “ឲ្យចប់ ឱ្យចេះ ឲ្យមានការងារ៕
