បាត់ដំបង៖ ព្រោះតែបញ្ហាសតិអារម្មណ៍ ក្មេងប្រុសម្នាក់ បានរត់ទៅលោតទឹកស្ទឹងសង្កែសម្លាប់ខ្លួនបង្កការភ្ញាក់ផ្អើលនៅវេលាម៉ោង ១៥និង១៥នាទី ថ្ងៃទី០២ ខែកក្កដា ឆ្នាំ២០២៦ នៅចំណុចខាងមុខសណ្ឋាគារឃីងហ្វី ស្ថិតក្នុងភូមិរំចេក៤ សង្កាត់រតនៈ ក្រុងបាត់ដំបង។
ប្រភពពីប្អូនស្រីឈ្មោះ ផុង ម៉ាលីចរិយា ដែលត្រូវជាម្តាយរបស់ក្មេងរងគ្រោះបានបញ្ជាក់ថា កូនប្រុសរបស់ខ្លួនឈ្មោះ ឌី សុឌិន អាយុ១៥ឆ្នាំ រស់នៅភូមិរំចេក៣ សង្កាត់រតនៈ ក្រុងបាត់ដំបង គាត់ជាមនុស្សមានជម្ងឺសតិអារម្មណ៍(អូរទីហ្សិម) ហើយនៅមុនពេលកើតហេតុ កូនប្រុសបានរករឿងអោយដឹកមកកន្លែងឪពុកដែលធ្វើសន្តិសុខយាមម៉ូតូរថយន្តនៅជិតកន្លែងវិមានឯករាជ្យក្រុងបាត់ដំបង លុះពេលខ្លួនដឹកមកដល់ខាងមុខសណ្ឋាគារឃីង ស្ថិតក្នុងភូមិរំចេក៤ សង្កាត់រតនៈ ក្រុងបាត់ដំបង ខ្លួនក៏បានឈប់ម៉ូតូដើម្បីនិយាយទូរស័ព្ទ ភ្លាមនោះកូនប្រុសក៏បានរត់ចុះទៅលោតទឹកស្ទឹងសង្កែ ភ្លាមនោះខ្លួនក៏បានទាក់ទងទៅប្តី និងបងប្អូនអោយជួយចុះរាវរក ប៉ុន្តែជាអកុសលពេលរកឃើញកូនប្រុសបានស្លាប់បាត់បង់ជីវិតទៅហើយ។
ក្រោយពេលកើតហេតុសមត្ថកិច្ចជំនាញបានចុះទៅពិនិត្យ និងកោសល្យវិច័យឃើញថា ក្មេងប្រុសខាងលើពិតជាស្លាប់ដោយសារលង់ទឹកពិតប្រាកដមែន បន្ទាប់មកក៏បានធ្វើកំណត់ហេតុប្រគល់សពអោយឪពុកម្តាយដើម្បីយកទៅធ្វើបុណ្យតាមប្រពៃណី៕
